Għodod Elettroniċi għall-Malti

Illum il-ġurnata qarrej tal-provi x'aktarx jirċievi t-test oriġinali f'format elettroniku u jintalab jikkoreġih bl-istess mezz. Illum jeżistu bosta mezzi (l-aktar programmi ta' software) biex jintlaħqu dawn l-għanijiet, imma l‑esperjenza turi li mhux kollha huma magħrufa bl-istess mod mill-qarrejja tal-provi u minn studenti universitarji li jkollhom bżonnhom għat-tifsil ta' assenjamenti u teżijiet.

F'dawn il-korsijiet jiġi spjegat kif jaħdmu dawn il-mezzi u l-vantaġġi tagħhom. Tiġi diskussa wkoll il-problema tal‑karattri Maltin u l-inkompatibilità tas-sistemi eżistenti bejniethom.

Permezz ta' għadd ta' sigħat fil-laboratorju tal-kompjuter, l-istudenti jitħarrġu fil-qari tal-provi u fit-tifsil ta' assenjamenti u teżijiet permezz tal-elettronika. Dan is-sit jikkumplimenta l-programm billi joffri aktar riżorsi elettroniċi marbutin mal-lezzjonijiet.